Լաբորատորիա

Լաբորատոր ծառայությունը «Արաբկիր» բժշկական համալիրում

laboratory

«Արաբկիր» բժշկական համալիրի լաբորատորիան բաղկացած է կլինիկական, կենսաքիմիական, իմունաբանական, վիրուսաբանական, մանրէաբանական և սքրինինգային բաժիններից, որտեղ իրականացվում են կենսաբանական տարբեր հեղուկների և նյութերի` արյան, մեզի, կղանքի, ողնուղեղային հեղուկի, մաշկից`  քերուկների, տարբեր օրգանների արտազատուկների կենսաքիմիական, արյունաբանական, իմունաբանական, վիրուսաբանական, մանրէաբանական հետազոտություններ: Հետազոտություններն իրականացվում են հիվանդանոցում բուժվող, դիսպանսեր հսկողության տակ գտնվող, ինչպես նաև ամբուլատոր կարգով դիմող պացիենտների համար: Լաբորատորիայում իրականացվող բոլոր ծառայություններից կարող են օգտվել յուրաքանչյուր  ուղեգրված կամ առանց ուղեգրի անձինք՝ առանց որևէ տարիքային կամ այլ սահմանափակումների:

IMG_3284Լաբորատորիան ստեղծվել է 1997 թ. «Արաբկիր» բժշկական համալիրի արտասահմանյան գործընկերների աջակցությամբ, որոնք Շվեյցարիայի և Բելգիայի տարբեր հիվանդանոցների լաբորատորիաներից ուղարկել էին օգտագործված, սակայն դեռևս աշխատող բիոքիմիական անալիզատորներ` արյան մեջ էլետրոլիտների կոնցենտրացիան և թթվահիմնային հավասարակշռությունը որոշելու համար: Այդ ժամանակ լաբորատորիան ուներ ընդամենը երկու աշխատող՝ մեկ բժիշկ լաբորանտ և մեկ լաբորանտ: Աստիճանաբար այն համալրվեց արտասահմանյան հայտնի ընկերությունների Roche, Sysmex, Stago, Perkin Elmer  ժամանակակից ավտոմատ անալիզատորներով և  սարքավորումներով:

IMG_3256Ներկայում լաբորատորիայում աշխատում են 33 բարձր որակավորում ունեցող ու փորձառու մասնագետներ: Լաբորատոր ծառայությունը ղեկավարում է կ.գ.թ. Մարինե Ժորայի Հովսեփյանը, ով վերապատրաստվել է արտասահմանյան մի շարք երկրների՝ այդ թվում Շվեյցարիայի, Ֆրանսիայի, Բելգիայի, Գերմանիայի համալսարանական հիվանդանոցների լաբորատորիաներում, ակտիվ մասնակցում է միջազգային սեմինարների, կոնֆերանսների և մի շարք գիտական հոդվածների հեղինակ է:

2005 թվականից լաբորատորիան իրականացնում է նորածնային սքրինինգի ազգային ծրագիր` բնածին հիպոթիրեոզ, իսկ 2014 թվականից` ֆենիլկետոնուրիա հիվանդությունների հայտնաբերման համար: Երկու ծրագրերն ներդրվել են շվեյցարացի գործընկերների ֆինանսական և գործնական աջակցությամբ, որի պատասխանատվությունը հետագայում իր վրա է վերցրել ՀՀ առողջապահության նախարարությունը: Այժմ այն լիովին ֆինանսավորվում է պետության կողմից:

IMG_3210Տարեց-տարի ավելանում է լաբորատոր հետազոտությունների ցանկը և ծավալը: 2017 թ. իրականացվել են մոտավորապես 502.000 հետազոտություն, որոնցից նորածինների բնածին հիպոթիրիոզի սքրինինգի նպատակով` 38.500  և 16.060` ֆենիլկետոնուրիայի հայտնաբերման համար: 2005-2017 ժամանակահատվածում  իրականացված  404.881 նորածինների սքրինինգային հետազոտությունների արդյունքում 137 նորածնի մոտ հայտնաբերվել է բնածին հիպոթիրեոզ, իսկ 11-ի մոտ` ֆենիլկետոնուրիա: Հայտնաբերված բոլոր երեխաները գտնվում են դիսպանսեր հսկողության տակ: 2016 թվականից բնածին հիպոթիրեոզի սքրինինգային ծրագիրը կյանքի է կոչվել նաև Լեռնային Ղարաբաղում, իսկ 2018 թվականից ավելացել է նաև ֆենիլկետոնուրիայի սքրինինգը:

Հետազոտությունների որակի արտաքին և ներքին վերահսկումը լաբորատորիայի գործունեության կարևոր բաղկացուցիչ մասն է:  Լաբորատորիան 2013 թվականից մասնակցում է RIQAS (RANDOX International Quality Assessment Scheme) որակի գնահատման միջազգային ծրագրին` կլինիկական քիմիա բաժնում:

Յուրաքանչյուր երկու շաբաթը մեկ անհայտ կոնցենտրացիայով նմուշների  հետազոտության արդյունքներն առցանց ուղարկվում են RIQAS ծրագրի համապատասխան լաբորատոր կոդին: Յուրաքանչյուր հետազոտական փուլ ավարտվելուց հետո վերահսկման միջազգային կազմակերպության կողմից վերլուծվում են լաբորատորիայի կողմից կատարված հետազոտությունների արդյունքները:  Եթե դրանք համապատասխանում են վերստուգիչ ցուցանիշներին, ապա նրանց կողմից տրամադրվում է հավաստագիր:

IMG_3223Վերահսկվող կենսաքիմիական հետազոտություններն են.

•    կրեատինին,
•    միզանյութ,
•    ընդհանուր սպիտակուց,
•    ալբումին,
•    գլյուկոզա,
•    ֆոսֆոր,
•    ալանինամինոտրանսֆերազ  (ԱԼՏ),
•    ասպարտատամինոտրանսֆերազ (ԱՍՏ),
•    գամմա-գլյուտամիլտրանսֆերազ (ԳԳՏ),
•    հիմնային ֆոսֆատազ,
•    ընդհանուր խոլեսթերին,
•    բարձր խտության լիպոպրոտեիդներ,
•    ցածր խտության լիպոպրոտեիդներ,
•    տրիգլիցերիդներ:

IMG_3248Վերահսկվող իմունաբանական հետազոտություններ են.

•    ընդհանուր պրոստատ սպեցիֆիկ անտիգեն (t-PSA),
•    թիրեոիդ խթանող հորմոն (TSH),
•    ազատ թիրօքսին (f-T4),
•    ընդհանուր տրիյոդթիրոնին (T3):

Վերոնշյալ կենսաքիմիական և իմունաբանական հետազոտությունների որակի վերահսկման միջազգային ծրագրին մասնակցելու համար 2014, 2015, 2016 և 2017 թթ.  լաբորատորիան ստացել է հավաստագրեր:

Բնածին հիպոթիրեոզի նորածնային սքրինինգի հետազոտությունների որակի վերահսկումը իրականացվում է 2005 թվականից ԱՄՆ-ի  CDC-ի կողմից, որն, ամփոփելով լաբորատորիայի ստուգիչ հետազոտությունների տվյալները, շնորհել է հավաստագրեր` լաբորատորիայի գործառույթների ընդունված միջազգային որակի չափանիշներին համապատասխանության համար:

Լաբորատորիան նյութական և կրթական աջակցություն է ստանում Շվեյցարիայի, Բելգիայի, Ֆրանսիայի և Ռուսաստանի համալսարանական հիվանդանոցների տարբեր մասնագետներից:

Մեր մասնագետները

IMG_3478 Լաբորատոր ծառայության ղեկավար

Մարինե Հովսեփյան, կ.գ.թ.

Իմունոլոգիա

Լուսնթագ Կծոյան, բ.գ.թ.

 

Կենսաքիմիա

Նունե Ավագյան

Նաիրա Բալյան

Լիլիթ Յավրույան

Արյունաբանություն

Լիանա Արզումանյան

Կարինե Եղիազարյան

Մանրէաբանություն

Լիլիթ Հայրապետյան

Անուշ Ոսկանյան

Վիրուսաբանություն

Կարինե Այվազյան

Սքրինինգային լաբորատորիա

Ֆլորա Վարդանյան

 

Տեղեկատվություն պացիենտների համար

Հեռախոս. +37410 23-68-83, ներքին 11-36

Հասցե. 30, փող. Մամիկոնյանց, Երևան, 0014